У Новы год – разам!

Час навагодніх святаў  – гэта час прыгожай, добрай казкі, якая прыходзіць у кожны дом, дорыць надзею і прымушае спадзявацца на лепшае, час прыемных клопатаў і хваляванняў, час дарыць падарункі, час чароўных сюрпрызаў і сустрэч.

Добрай і ўсімі ўпадабанай традыцыяй у БрДУ імя А. С. Пушкіна стала навагодняе віншаванне навучэнцаў рэктарам універсітэта. Вось і ў гэты раз 31 снежня за некалькі гадзін да бою курантаў павіншаваць замежных студэнтаў, якія пражываюць у інтэрнатах студэнцкага гарадка, прыехала Ганна Мікалаеўна Сендзер – рэктар універсітэта, доктар педагагічных навук, прафесар.

Ганна Мікалаеўна павіншавала замежных навучэнцаў з Новым годам, пажадала ім шчасця, здароўя, поспехаў у вучэбнай дзейнасці, бо Новы год, як і любое свята, – гэта нагода сустрэцца і падзяліць з навакольнымі шчасце і радасць, выказаць сваю любоў, падзяку і ўдзячнасць .

Такія сустрэчы напярэдадні Новага года заўсёды выклікаюць кранальныя эмоцыі, дапамагаюць адчуць па-сапраўднаму хатнюю атмасферу з падарункамі і шчырымі пажаданнямі адзін аднаму людзям, якія знаходзяцца за тысячы кіламетраў ад роднай сям’і. Доказам таму з’яўляюцца радасныя твары навучэнцаў на мностве фотаздымкаў, зробленых у гэты святочны навагодні вечар з рэктарам універсітэта.

Новы год – гэта час верыць у цуды!