Рэспубліканская навукова-практычная канферэнцыя «Сучасная журналістыка: традыцыі, наватарства, кантэкст»

11 сакавіка 2016 года на філалагічным факультэце адбылася рэспубліканская навукова-практычная канферэнцыя «Сучасная журналістыка: традыцыі, наватарства, кантэкст». Арганізатарам форуму выступіла кафедра журналістыкі. Аб удзеле (вочным і завочным) у канферэнцыі заявілі больш за 100 навукоўцаў з Беларусі, Украіны, Расіі, Казахстана, Польшчы. Значную колькасць дакладаў прадставілі маладыя даследчыкі – аспіранты, магістранты, студэнты.

Праблемнае поле канферэнцыі ўключала пытанні тэорыі і практыкі сучаснай журналістыкі, адукацыі і медыяадукацыі, дыскурсіўных стратэгій сучаснай славеснасці, сувязяў журналістыкі з іншымі відамі творчасці і інш., што былі абмеркаваны на 8 секцыях.

Вялікую цікавасць у слухачоў выклікалі выступленні навукоўцаў і практыкаў на пленарным пасяджэнні. Доктар філалагічных навук, прафесар кафедры журналістыкі ГрДУ імя Янкі Купалы Марыя Іосіфаўна Канюшкевіч прадставіла навуковай супольнасці даклад на тэму «Медыялізацыя першасных жанраў у СМІ». Кандыдат філалагічных навук, дацэнт кафедры медыялогіі і вэб-журналістыкі Інстытута журналістыкі БДУ Аляксандр Аляксандравіч Градзюшка прааналізаваў сістэмныя характарыстыкі рэгіянальных інтэрнэт-СМІ Брэсцкай вобласці. Доктар палітычных навук, прафесар кафедры паліталогіі і сацыялогіі БрДУ імя А.С. Пушкіна Анатоль Іванавіч Лысюк выступіў з дакладам «СМІ ў кантэксце сучасных гібрыдных войнаў».

Практычную састаўную форуму на пленарным пасяджэнні прадставілі вядучыя журналісты Брэстчыны – загадчык аддзела сацыяльных праблем абласной газеты «Народная трыбуна» Святлана Апанасаўна Таболіч і кандыдат філалагічных навук, уласны карэспандэнт газеты «Рэспубліка» Ганна Генадзьеўна Петрачэнка.

Пры падвядзенні вынікаў працы канферэнцыі было прынята рашэнне аб правядзенні падобнага форуму штогод.

Кафедра журналістыкі

Фота: У.А. Сенькавец