Майстар-клас «Імідж прафесіянала: традыцыі і сучаснасць»

Прафесійная кар'ера будучых спецыялістаў у значнай меры залежыць ад прафесійнага іміджу. 11 лістапада 2014 года цэнтр «Прафарыенцір» сумесна з вучэбнай фальклорна-краязнаўчай лабараторыяй арганізавалі і правялі майстар-клас «Імідж прафесіянала: традыцыі і сучаснасць», у якім удзельнічалі студэнты сацыяльна-педагагічнага, філалагічнага факультэтаў і замежныя слухачы падрыхтоўчага курса факультэта даўніверсітэцкай падрыхтоўкі.

Кіраўнік цэнтра «Прафарыенцір» М.С. Кавалевіч звярнулася да прысутных з уступным словам, засяродзіла ўвагу на актуальнасці ўвядзення і захавання дрэс-кода студэнтамі ўніверсітэта і падкрэсліла важнасць іміджу ў прафесійнай сферы.

Кіраўнік фальклорна-краязнаўчай лабараторыі доктар філалагічных навук, прафесар І.А. Швед раскрыла сутнасць ідэі беларускага дрэс-кода, пазнаёміла з гісторыяй і адзінымі правіламі дрэс-кода. Прафесар падкрэсліла: беларуская жанчына заўсёды будзе сімвалам прыгажосці, высакароднасці і дасканаласці, якія так неабходны любой жанчыне, каб адчуваць сябе сапраўднай Жанчынай. Студэнты філалагічнага факультэта арганізавалі майстар-клас «Выкарыстанне беларускага традыцыйнага касцюма ў сямейнай абраднасці».

Студэнты сацыяльна-педагагічнага факультэта падрыхтавалі для аўдыторыі прэзентацыю пра складнікі іміджу прафесіянала: індывідуальнасць чалавека, стыль і моду. Прысутныя атрымалі рэкамендацыі па стварэнні свайго іміджу.

У заключэнне ўдзельнікі мерапрыемства прыйшлі да высновы:

• Знешні выгляд – гэта не прыватная справа чалавека.
• Строгая вопратка дысцыплінуе, настройвае на працу, у той час як вольны стыль расхалоджвае.
• Чалавек, які прытрымліваецца нормаў у вопратцы, міжволі больш строга будзе прытрымлівацца і іншых правілаў.
• Агульны стыль у вопратцы, а ў яшчэ большай ступені адзіная форма аб'ядноўвае людзей, спрыяе фарміраванню супольнасці, каманды.
• Сучаснаму ўніверсітэту, яго лаканічнаму інтэр'еру з эстэтычнага пункту гледжання больш адпавядае дзелавая вопратка студэнтаў і супрацоўнікаў.
• У навучальнай установе непрымальныя: залішняя экстравагантнасць, дэкальтэ, міні-спадніцы, мехаватае адзенне, пляжная вопратка.

  Асноўнае правіла пры выбары вопраткі – гэта яе адпаведнасць і часу, і абстаноўцы.

Сустрэча была вельмі цікавай для будучых спецыялістаў сацыяльнай сферы, псіхолагаў і замежных слухачоў. Бясспрэчна, гэта сведчыць пра тое, што ва ўсіх прысутных ёсць жаданне навучыцца правільна ствараць свой прафесійны імідж, які шмат у чым вызначае дасягненне поспеху ў прафесійнай сферы.

М.С.Кавалевіч,
кіраўнік цэнтра «Прафарыенцір»