Круглы стол «У цэнтры ўвагі залежныя паводзіны»

У межах Тыдня псіхалогіі 27 лістапада адбыўся гарадскі круглы стол «У цэнтры ўвагі залежныя паводзіны», дзе абмяркоўваліся праблемы залежных паводзін у моладзевым асяроддзі.

Адхіляльныя паводзіны чалавека аказваюць згубнае ўздзеянне на яго самаадчуванне, інтэлектуальны, прафесійны, генетычны патэнцыял грамадства. Усё гэта можа прывесці да скарачэння нараджальнасці і сярэдняй працягласці жыцця, пагаршэння здароўя людзей, падрыву працоўных рэсурсаў краіны, паслаблення фундаментальнай асновы грамадства – сям’і.

Праектар па выхаваўчай працы Таццяна Васільеўна Сакалова ва ўступным слове звярнулася да ўдзельнікаў мерапрыемства – студэнтаў першага курса, якіх сабралася нямала – больш за сто чалавек – завастраючы ўвагу на такім важным аспекце, як фарміраванне псіхалагічнай устойлівасці да залежных формаў паводзін у студэнцкай моладзі.

У сваім выступленні педагог-псіхолаг БрДУ імя А. С. Пушкіна Наталля Сяргееўна Ануфрыкава актуалізавала веды студэнтаў аб залежных паводзінах, раскрыла сацыяльна-псіхалагічную сутнасць гэтага феномена.

Кіраўнік аддзела па супрацьдзеянні наркаманіі і алкагалізму Брэсцкай епархіі іерэй Дзімітрый Амельянец адзначыў, што залежнасць – гэта бія-псіха-сацыя-духоўная праблема, якая ў асноўным выяўляецца ва ўжыванні рэчываў, што змяняюць свядомасць. З пункту гледжання царквы залежнасць прызнаецца грахом, у сувязі з чым з гэтай заганай трэба змагацца, імкнучыся да цвярозасці свядомасці.

Кіраўнік праваслаўнага моладзевага руху ў абарону традыцыйных сямейных каштоўнасцяў «Сапраўднае жыццё» Яўгенія Міхайлаўна Марозава назвала формы працы з моладдзю па прафілактыцы залежных паводзін: праекты, семінары, сустрэчы-гутаркі, круглыя сталы і інш. Удзельнікі моладзевага руху аказваюць падтрымку дзецям, якія знаходзяцца ў УАЗ «Брэсцкая гарадская бальніца», жанчынам, што апынуліся ў цяжкай жыццёвай сітуацыі, праводзяць мерапрыемствы ў вайсковых часцях па развіцці маральных якасцяў у вайскоўцаў.

Доктар-псіхатэрапеўт УАЗ «Брэсцкі абласны наркалагічны дыспансер» Уладзіслаў Ігаравіч Прэцкайла пазнаёміў аўдыторыю з працэсам фарміравання як хімічнай, так і нехімічнай залежнасці ў чалавека, а таксама спосабамі аказання дапамогі людзям з залежнасцю.

Пасля выступленняў спецыялістаў працягвалася бурнае абмеркаванне прапанаванай тэмы. Студэнты задавалі шмат пытанняў, што сведчыць пра неабыякавасць маладых людзей да праблемы, якую абмяркоўваюць.

Залежныя паводзіны студэнцкай моладзі – праблема, якая патрабуе комплекснага падыходу, і толькі разам мы зможам справіцца з гэтай негатыўнай з’явай сучаснага свету.

Сацыяльна-педагагічная і псіхалагічная служба