Ганаровы доктар БрДУ імя А.С. Пушкіна прафесар Клаус Разенталь нанёс візіт у наш універсітэт

24 красавіка 2016 года ў Брэсцкі дзяржаўны ўніверсітэт імя А.С. Пушкіна прыбыў загадчык кафедры менеджменту і маркетынгу ўніверсітэта г. Падэрборн (ФРГ), ганаровы доктар БрДУ імя А.С. Пушкіна, прафесар Клаус Разенталь. 25 красавіка 2016 года адбылася сустрэча К. Разенталя з рэктарам нашага ўніверсітэта, прафесарам Г.М. Сендзер, на якой абмяркоўваліся перспектывы ўзаемнага супрацоўніцтва ў адукацыйнай сферы. У той жа дзень К. Разенталь прачытаў у чытальнай зале бібліятэкі ўніверсітэта лекцыю на тэму «Вытокі ідэі справядлівасці».

Праблема сацыяльнай справядлівасці з’яўляецца цэнтральнай для сучаснай палітычнай філасофіі і этыкі. Яшчэ з часоў антычнасці справядлівасць трывала ўвайшла ў кантэкст філасофскіх дыскусій, а спрэчкі пра змест гэтага паняцця не сціхаюць да гэтага часу. Прафесар Разенталь на сваёй лекцыі разгледзеў змястоўны сэнс паняцця справядлівасці ў святле класічных філасофскіх канцэпцый. У прыватнасці, ён, абапіраючыся на ідэі і дзеянні Платона і Арыстоцеля, даў кароткі параўнальны аналіз ідэі справядлівасці ў іншых філасофскіх тэорыях. Яшчэ ў пачатку лекцыі К. Разенталь прапанаваў прысутным дыскусійную форму зносін, што абумовіла пастаноўку пытанняў аб прычынах узнікнення дзяржавы і законаў, пра іх узаемадзеянне, аб агульначалавечых каштоўнасцях і заканамернасцях развіцця грамадства. Акрамя гэтага, прафесар закрануў праблематыку ідэнтычнасці і разнастайнасці ў сучасным грамадстве.

Лекцыя выклікала цікавасць у студэнтаў шэрагу факультэтаў: замежных моў, геаграфічнага, сацыяльна-педагагічнага і фізічнага выхавання. Варта адзначыць, што лекцыя прафесара Разенталя праходзіла без перакладу, таму ў студэнтаў была магчымасць не толькі пашырыць свой кругагляд, але і ўдасканаліць сваю лінгвістычную кампетэнцыю.

У час знаходжання ў Брэсце прафесар Клаус Разенталь працягнуў знаёмства са славутасцямі нашага горада і яго ваколіц. У праграму яго знаходжання была ўключана экскурсія ў сядзібу Нямцэвічаў у в. Скокі, а таксама наведванне аграсядзібы «На Зарэчнай вуліцы».

І.В. Абрамава,
дэкан геаграфічнага факультэта