Напоўнім музыкаю сэрцы

Народная вакальная студыя «Ступені» 30 мая выступіла са справаздачным канцэртам «Напоўнім музыкаю сэрцы…».

Мерапрыемства адкрыла прарэктар па выхаваўчай працы Таццяна Сакалова, якая адзначыла, што ўсе выступленні «Ступеняў» – гэта свята, бо ў іх заўжды адчуваецца гарманічнае супрацоўніцтва педагога і салістаў, любоў да музыкі, яднанне прафесіяналізму кіраўніка і таленту студэнтаў. Таццяна Васільеўна падзякавала кіраўніку студыі Ларысе Борсук і студэнтам за іх працу.

Удзельнікі выступалі поўным складам, сольна і дуэтамі. У іх рэпертуары асаблівае месца адведзена тэме роднай Беларусі і Вялікай Айчыннай вайны. Так, салісты выканалі песню «Жыццё – цудоўнае імгненне», Ганна Крывецкая – песню «Куточак Беларусі», Уладзіслаў Макарэвіч – кампазіцыі «Спадчына» і «Родная мова». Акрамя эстрадных песень, у канцэртнай праграме гучалі арыі і рамансы. Гэта падкрэслівае жанравую разнастайнасць музычнага матэрыялу, з якім здольны працаваць салісты. Больш за ўсё гледачам спадабаліся харавыя музычныя кампазіцыі «Мы – Сусвет» і «Алілуя каханню», якія былі сустрэты гучнымі апладысментамі.

У канцы справаздачнага канцэрта Ларыса Борсук зазначыла, што музыка – мастацтва пачуццёвае. Менавіта перадаць гаму эмоцый стараліся салісты падчас мерапрыемства. Салiсты народнай вакальнай студыі «Ступені» падзякавалі Ларысе Іванаўне за насычанае творчае жыццё і ўручылі ёй кветкі.

Юлія Воўк, студэнцкі клуб