Філалагіні – прызёры рэспубліканскага конкурсу сацыяльных моладзевых праектаў “Моладзь Беларусі за жыццё, мараль і сямейныя каштоўнасці”

12 мая ў духоўна-асветніцкім цэнтры “Каўчэг” Свята-Елісавецінскага манастыра горада Мінска прайшоў Рэспубліканскі моладзевы форум “Сэнс. Жыццё. Будучыня”, які сабраў школьнікаў, студэнтаў, педагогаў, духавенства, прадстаўнікоў Міністэрства адукацыі.

Стварэнне сям'і, нараджэнне і выхаванне дзяцей, здаровы лад жыцця, міласэрнасць, дапамога тым, хто апынуўся ў складанай жыццёвай сітуацыі, – гэтыя тэмы аб'ядналі ўдзельнікаў форуму. У межах мерапрыемства адбылося ўзнагароджанне пераможцаў рэспубліканскага конкурсу “Моладзь Беларусі за жыццё, мараль і сямейныя каштоўнасці”, на які свае праекты прадставілі школьнікі і студэнты краіны. У іх ліку праект “Творчасць з НЕабмежаванымі магчымасцямі” студэнтак філалагічнага факультэта Ангеліны Такарчук, Марыі Сівак і Марыі Талатыннік. Ідэя праекта – папулярызаваць творчасць таленавітых людзей з НЕабмежаванымі магчымасцямі. Гэтая творчасць з'яўляецца ілюстрацыяй такога складніка нацыянальнай культуры, як афарыстыка і мастацкая літаратура.

Вялікую дапамогу ў ходзе праекта аказвала паэтка Кацярына Мізерыя – выпускніца філфака, а цяпер рэдактар рэдакцыйна-выдавецкага аддзела БрДУ. Яе вершы сталі асновай усіх серый праекта.

Творчасць з НЕабмежаванымі магчымасцямі, да якой дакрануліся аўтары праекта і ўдзельнікі мерапрыемстваў, арганізаваных дзяўчатамі, абуджае Любоў, Міласэрнасць як галоўныя каштоўнасці нашага жыцця, раскрывае Прыгажосць свету і людзей.

Праект філалагінь увайшоў у лік пераможцаў конкурсу і быў адзначаны дыпломам ІІІ ступені. Ад усёй душы віншуем дзяўчат і жадаем поспехаў у рэалізацыі творчых ідэй!

Святлана Феадосьеўна Бут-Гусаім,
дацэнт кафедры беларускага і рускага мовазнаўства