БрДУ наведалі ўдзельнікі ІХ Рэспубліканскага фестывалю беларускіх фільмаў

У БрДУ адбылася сустрэча з вядомымі дзеячамі кіно Беларусі і Расіі. Яны размаўлялі са студэнцкай моладдзю ў рамках ІХ Рэспубліканскага фестывалю беларускіх фільмаў, які з 25 па 29 верасня праходзіць у Брэсце. Галоўная мэта іх візіту – прэзентацыя духоўна-асветніцкай праграмы СТВ “Дакрананне да святла”.

Аўтарам праекта “Дакрананне да святла” з'яўляецца журналіст і тэлевядучы Алег Мікалаевіч Лепяшэнкаў. Ён расказаў аб гэтай духоўна-асветніцкай праграме і аб ролі духоўнасці ў жыцці чалавека.

Старшыня Рэспубліканскага грамадскага аб'яднання “Беларускі саюз кінематаграфістаў” Яўген Мікалаевіч Арэндарэвіч сказаў: важна, каб мы бачылі больш менавіта беларускіх фільмаў з глыбокім зместам.

Яшчэ адзін спікер Аляксей Мікалаевіч Бязуглы – кінапрадзюсар. Ён паведаміў, што для беларускага кіно вельмі каштоўная падтрымка Кіраўніка дзяржавы, але пакуль не ўдалося парадаваць яго шэдэўрамі сусветнага ўзроўню. Беларускі кінематограф перажывае перазагрузку і многія надзеі звязаны з таленавітай моладдзю. Член Прэзідыума Беларускага саюза кінематаграфістаў Аляксандр Іванавіч Копелеў адзначыў, што існуе альтэрнатыўнае кіно і акцэнтаваў увагу на тым, што канчатковая мэта культурнага прадукту – не зараблянне грошай, а фарміраванне духоўна-маральных каштоўнасцей.

Для актрысы, лаўрэата Дзяржаўнай прэміі СССР Алены Мікалаеўны Барзавой Беларусь – амаль родная краіна. Яна шмат здымалася ў нашай сталіцы і, як сама кажа, “практычна жыла ў Мінску”. Раней бывала і ў Брэсце на адным з фестываляў беларускіх фільмаў. Яна давала наказ моладзі берагчы культуру і чытаць класіку.

Студэнтам да прагляду прапанавалі фільм “Трасцянец”. Сустрэча завяршылася выступленнем артыстаў тэатра кінаакцёра кінастудыі “Беларусьфільм” Віялеты Дзмітрыеўны Крыванос і Арцёма Рыгоравіча Давідовіча, якія пад гітару выканалі песні з савецкіх фільмаў. Характэрна, што ў Віялеты Дзмітрыеўны Крыванос сёння дзень нараджэння – і пушкінцы песняй павіншавалі яе з гэтым святам.

Нагадаем, Рэспубліканскі фестываль беларускіх фільмаў праводзіцца з 1997 года. Пасля працяглага перапынку ён адрадзіўся ў 2025-м. Фестываль уключае конкурсную праграму і пазаконкурсныя мерапрыемствы. Ён стартаваў кінастужкай “Класная” маладога рэжысёра Кірыла Халецкага. Нашы студэнты ўжо паспелі паглядзець гэтую кінакарціну і даць ёй высокую адзнаку.

Юлія Воўк
Фота Вікторыі Шведоўскай і Наталлі Пятровай