У БрДУ адбыўся ўрачысты прыём у рэктара, прымеркаваны да Дня маці

На пытанне, што аб’ядноўвае ўсіх людзей на зямлі, кожны адразу адкажа, што гэта мама, увагай, ласкай, любоўю і клопатам якой мы акружаны з першых хвілін свайго жыцця. Таму свята Дзень маці займае асаблівае месца ў нашых сэрцах.

12 кастрычніка, напярэдадні гэтага светлага дня, у нашым універсітэце адбыўся ўрачысты прыём у рэктара Г.М. Сендзер. На прыём былі запрошаны работнікі БрДУ: шматдзетныя мамы, мамы, якія выхоўваюць дзяцей з асаблівасцямі псіхафізічнага развіцця, маці-адзіночкі і жанчыны, якія аформілі апеку.

Ганна Мікалаеўна павітала і павіншавала ўсіх запрошаных. Яна пажадала ім здароўя, бадзёрасці і невычэрпнай энергіі. Вочы маці, якія працуюць у нашым універсітэце, заўсёды выпраменьваюць шчасце, таму рэктар універсітэта пажадала, каб прычына гэтага бляску – поспехі дзяцей – з кожным годам прымнажалася. Таксама ўсе мамы атрымалі ад рэктара падарункі да свята – сертыфікаты крамы «Дзіцячы свет» і фатаграфіі на памяць пра свята.

Завяршыўся прыём кранальнай канцэртнай праграмай, на якой лепшыя песні пра мам выканалі студэнты Мікалай Вабішчэвіч, Алёна Ліцук, Андрэй Пракапчук і Дзмітрый Машчук.

Юлія Воўк, рэдактар студэнцкага клуба