У 1969 годзе факультэт мовы і літаратуры і падрыхтоўкі настаўнікаў пачатковых класаў быў падзелены на два самастойныя факультэты: філалагічны і педагагічны. У сувязі з адкрыццём на педагагічным факультэце спецыяльнасці “Псіхалогія” ў 1999 годзе факультэт перайменаваны ў псіхолага-педагагічны.
Сёння на факультэце вядзецца навучанне па 3-х спецыяльнасцях: пачатковая адукацыя, псіхалогія, практычная псіхалогія.
На кафедрах факультэта працуе больш за 50 выкладчыкаў, у ліку якіх – 1 доктар філалагічных навук, 1 доктар педагагічных навук, 1 доктар псіхалагічных навук, 4 прафесары, 7 кандыдатаў педагагічных навук, 4 кандыдаты філалагічных навук, 10 кандыдатаў псіхалагічных навук, 1 кандыдат біялагічных навук, 1 кандыдат філасофскіх навук. На факультэце на ўсіх формах навучання займаецца больш як 700 студэнтаў.
Выкладчыкі факультэта ўдзельнічаюць у распрацоўцы навукова-даследчых тэм. У арганізацыі навукова-даследчай дзейнасці студэнтаў у розных формах удзельнічаюць усе выкладчыкі факультэта. Асноўнай формай вучэбнай навукова-даследчай дзейнасці студэнтаў з’яўляецца правядзенне навуковых даследаванняў у межах курсавых і дыпломных прац. Значная ўвага надаецца фарміраванню ў студэнтаў навуковых кампетэнцый і метадалагічных навыкаў навуковых даследаванняў. Для ўдзелу ў Рэспубліканскім конкурсе навуковых прац студэнтаў вышэйшых навучальных устаноў Рэспублікі Беларусь факультэтам штогод прад’яўляюцца найлепшыя дыпломныя даследаванні.
На дадзены момант на факультэце праводзяць навукова-даследчую дзейнасць 13 студэнцкіх навукова-даследчых аб’яднанняў: на кафедры педагогікі пачатковай адукацыі – 5, на кафедры псіхалогіі – 5, на кафедры агульнаадукацыйных дысцыплін і методык іх выкладання – 3. Тэматыка працы студэнцкіх навукова-даследчых аб’яднанняў дастаткова варыятыўная, што дае магчымасць уключаць студэнтаў у даследчую дзейнасць у самых розных напрамках. На факультэце працуе СНТ. Студэнты спецыяльнасці “Псіхалогія” займаюцца навукова-практычнай дзейнасцю ў студэнцкіх навуковых лабараторыях. Вынікі сваёй працы студэнты абмяркоўваюць на навуковых канферэнцыях і семінарах. Штогод на факультэце праводзяцца Дні навукі. Вынікам навуковых круглых сталоў, дыскусій, прэзентацый з’яўляецца студэнцкая навуковая канферэнцыя, на якой у розных секцыях выступаюць студэнты ўсіх спецыяльнасцей факультэта з дакладамі па розных навуковых напрамках. Вынікі студэнцкіх навуковых даследаванняў публікуюцца ў зборніках артыкулаў.
Кафедрай псіхалогіі арганізавана актыўнае міжнароднае супрацоўніцтва з ВНУ Украіны: Пераяслаўль-Хмяльніцкім дзяржаўным універсітэтам імя Грыгорыя Скаварады і Ровенскім дзяржаўным гуманітарным універсітэтам. На цяперашні момант кафедрай педагогікі пачатковай адукацыі таксама вядзецца праца па падпісанні дагавора аб навуковым супрацоўніцтве з Пераяслаўль-Хмяльніцкім дзяржаўным універсітэтам імя Грыгорыя Скаварады МА Украіны.
