Навіны

31 мая 2019 года на псіхолага-педагагічным факультэце УА «Брэсцкі дзяржаўны ўніверсітэт імя А.С. Пушкіна» высадзіўся «дэсант» з групы васьмікласнікаў – навучэнцаў ДУА «СШ № 18 г. Брэста». Дзеці пад кіраўніцтвам педагога-псіхолага Кароза Ірыны наведалі студэнцкую навукова-даследчую лабараторыю «Псіхалогія працы і здароўя асобы», размешчаную на псіхолага-педагагічным факультэце пры кафедры псіхалогіі. Загадчык лабараторыі, кандыдат псіхалагічных навук, дацэнт кафедры псіхалогіі Севярын Аляксей расказаў навучэнцам аб напрамках працы лабараторыі, прадэманстраваў некаторыя прыборы і псіхалагічныя методыкі для дыягностыкі прафарыентацыі і пазнавальных працэсаў, асобасных якасцяў і інш.

30 мая 2019 года пры падтрымцы Брэсцкага аддзела грамадскага аб’яднання «Беларускі рэспубліканскі саюз юрыстаў» і Брэсцкай абласной калегіі адвакатаў кафедрай грамадзянска-прававых дысцыплін на базе БрДУ імя А.С. Пушкіна была праведзена юбілейная ХХ Рэспубліканская навукова-практычная канферэнцыя для студэнтаў, магістрантаў і аспірантаў «Актуальныя праблемы права». У навуковым мерапрыемстве прынялі ўдзел больш за 120 маладых юрыстаў з Беларусі і Украіны.

30 мая 2019 г. у Брэсцкай абласной бібліятэцы імя М. Горкага ў межах праекта «Гістарычныя сімвалы Брэста», прымеркаванага да 1000-годдзя нашага горада, адбылася адкрытая публічная лекцыя «Брэсцкі мір у гісторыі горада, краіны і свету». З лекцыяй выступаў доктар гістарычных навук, прафесар, загадчык кафедры гісторыі славянскіх народаў Вабішчэвіч Аляксандр Мікалаевіч. Удзельнікамі мерапрыемства былі супрацоўнікі ўстаноў культуры, выкладчыкі, студэнты, краязнаўцы і ўсе тыя, хто цікавіцца мінулым Брэста. Лектар асвяціў трагічныя падзеі Першай сусветнай вайны ў лёсе горада, паказаў складаны і супярэчлівы ход перамоў, заключэнне Брэсцкага мірнага дагавора 3 сакавіка 1918 г. у Белым палацы і яго сусветнае значэнне.

З 13 па 28 мая 2019 года на філалагічным факультэце праходзілі Дні славянскага пісьменства і культуры. Арганізатарам гэтых Дзён штогод з’яўляецца кафедра агульнага і рускага мовазнаўства. У гэтым годзе праграма Дзён была вельмі змястоўная: яна ўключала 14 мерапрыемстваў. Найбольш значнай стала Міжнародная студэнцкая навукова-практычная канферэнцыя «Слова ў мове, маўленні, тэксце», якая прайшла 17–18 мая 2019 года. Завяршыліся Дні славянскага пісьменства і культуры 28 мая: круглы стол «Я – выпускнік філфака БрДУ імя А.С. Пушкіна» аб’яднаў у цёплай гутарцы замежных студэнтаў 4-га курса філалагічнага факультэта і выкладчыкаў кафедры агульнага і рускага мовазнаўства.

Традыцыйны адкрыты ўніверсітэцкі фестываль «Старт пакаленняў» закончыўся ў Брэсцкім дзяржаўным універсітэце імя А.С. Пушкіна. Гэтае спартыўнае свята стала юбілейным, паколькі праводзілася ў 5-ы раз і было прысвечана тысячагадоваму юбілею г. Брэста. Асноўная мэта, якую ставіць пры правядзенні фестывалю яго галоўны арганізатар – кафедра фізічнай культуры ўніверсітэта, – садзейнічанне развіццю масавага фізкультурна-спартыўнага руху, што спрыяе фарміраванню здаровага ладу жыцця, а таксама маральнасці, патрыятызму, нацыянальнай самасвядомасці маладога пакалення. Таму і колькасць спартыўных мерапрыемстваў, якія прайшлі з 20 па 25 мая, даволі вялікая.

23–24 мая ў Акадэміі МУС Рэспублікі Беларусь адбыўся XIX Міжнародны конкурс прамоўніцкага майстэрства «Цыцыроній–2019». У конкурсе прынялі ўдзел маладыя прамоўцы з 25 ВНУ, прадстаўнікі дзесяці краін свету. Удзельнікамі конкурсу сталі пераможцы абласных, гарадскіх і вузаўскіх адборачных этапаў. Наш універсітэт на конкурсе прадставілі Зарана Ярмалюк, студэнтка II курса філалагічнага факультэта, і Лізавета Лапыцька, студэнтка III курса факультэта замежных моў. У працы журы конкурсу, якое склалі выкладчыкі 10 універсітэтаў з Беларусі, Украіны, Расіі, прыняла ўдзел старшы выкладчык кафедры агульнага і рускага мовазнаўства Ларыса Мікалаеўна Грыцук.

Дэлегацыя Міністэрства адукацыі Кітайскай Народнай Рэспублікі на чале з намеснікам Міністра Цянь Сюэцзюнем ў межах рэалізацыі Дырэктывы Прэзідэнта Рэспублікі Беларусь ад 31 жніўня 2015 г. № 5 «Аб развіцці двухбаковых адносін Рэспублікі Беларусь з Кітайскай Народнай Рэспублікай» і Плана мерапрыемстваў па правядзенні ў 2019 г. Года адукацыі Беларусі ў Кітаі наведала БрДУ імя А.С. Пушкіна 23 мая.

23 мая 2019 года на псіхолага-педагагічным факультэце адбылася IV Рэспубліканская студэнцкая навукова-практычная канферэнцыя «Крок у навуку», арганізатарам якой выступіла кафедра агульнаадукацыйных дысцыплін і методык іх выкладання. У працы канферэнцыі прынялі ўдзел школьнікі, студэнты і магістранты з пяці абласцей Рэспублікі Беларусь. На пленарным пасяджэнні выступілі з прэзентацыямі сваіх праектаў і дакладамі пераможцы конкурсу навуковых праектаў «Адкрываючы свет педагагічнай прафесіі», які праводзіўся сярод навучэнцаў 10–11-х класаў устаноў агульнай сярэдняй адукацыі Брэсцкай вобласці.