«Вучуся красамоўству»

10 сакавіка ў культурна-асветніцкім цэнтры імя У.А. Калесніка прайшло чарговае мерапрыемства з праграмы Фестывалю замежных студэнтаў – універсітэцкі конкурс прамоўніцкага майстэрства «Вучуся красамоўству-2015». У ім прынялі ўдзел 22 студэнты-інафоны з факультэтаў філалагічнага, замежных моў, псіхолага-педагагічнага, юрыдычнага, біялагічнага, геаграфічнага і фізіка-матэматычнага (Феліцыя Арнольд, слухачка ФДП, прапанавала сваё паведамленне пра жыццё моладзі ў ЗША па-за конкурсам).

Арганізатары, выкладчыкі кафедры агульнага і рускага мовазнаўства, падрыхтавалі цікавую і насычаную конкурсную праграму, якую прымеркавалі да Года моладзі. Першы этап – публічнае выступленне на тэму «Ці лёгка быць маладым». Прагучалі разважанні пра «плюсы» і «мінусы» гэтага перыяду жыцця чалавека, пра праблемы, з якімі сутыкаецца сучасная моладзь і якія даводзіцца ёй пераадольваць. Рабяты прапанавалі некаторыя шляхі, якімі можна вырашаць або ўжо вырашаюцца гэтыя праблемы, у тым ліку прагучалі прыклады з асабістага вопыту канкурсантаў, з жыцця іншых людзей, якія прыцягнулі ўвагу студэнтаў, сталі для іх у чымсьці прыкладам для пераймання.

Другі этап конкурсу – «Думкі ўслых» – складаўся з двух заданняў у рэжыме рыторыкі хуткага рэагавання. У міні-дыялогу «Мяне хвалюе ...» кожны канкурсант задаў адно пытанне на хвалюючую яго тэму свайму саперніку і, у сваю чаргу, адказаў на яго пытанне. У заданні «Мінімум слоў – максімум думкі» студэнты агучылі свае, максімальна блізкія па сэнсу да арыгінала, варыянты заканчэння выказвання вядомага чалавека.

Таксама ўсім прысутным студэнцкі клуб універсітэта прапанаваў невялікую канцэртную праграму.

У выніку напружанай (і гэта не проста метафара) барацьбы прызавыя месцы размеркаваліся наступным чынам:

І месца: Нурыева Гульшат, студэнтка 2-га курса факультэта замежных моў, і Аннабердыева Шырын, студэнтка 3-га курса філалагічнага факультэта;
ІІ месца: Чарыева Джэнет, студэнтка 2-га курса юрыдычнага факультэта;
ІІІ месца: Юсупаў Цімур і Мацякубаў Нурбек, абодва студэнты 2-га курса факультэта замежных моў.

Віншуем пераможцаў!

Кафедра агульнага і рускага мовазнаўства