Добрых пажаданняў, лістапад

«Добрых пажаданняў, лістапад» – менавіта гэтыя словы сталі тэмай канцэрта, прысвечанага Дню настаўніка. Свята мудрасці, дабрыні і ведаў, што аб’ядноўвае многія пакаленні, адбылося ў нашым універсітэце 4 кастрычніка 2018 года.

Рэктар БрДУ Ганна Сендзер шчыра павіншавала калектыў выкладчыкаў, якія лічаць універсітэт сваім другім домам, садзейнічаюць росквіту БрДУ сваімі поспехамі ў навукова-даследчай, творчай і спартыўнай дзейнасці, дораць студэнтам веды і дапамагаюць ім стаць высокакваліфікаванымі спецыялістамі. Ганна Мікалаеўна адзначыла, што педагогі шмат у чым вызначаюць лёс кожнага чалавека і выказала надзею на тое, што для студэнтаў многія выкладчыкі нашага ўніверсітэта з’яўляюцца прыкладам для пераймання. Яна ўручыла работнікам Ганаровыя граматы ўніверсітэта, граматы ўніверсітэта і падзякі рэктара.

З цёплымі словамі да выкладчыкаў звярнулася і старшыня прафкама работнікаў універсітэта Ларыса Чэлышава. Яна падкрэсліла, што багаж ведаў, якім валодаюць нашы педагогі, дазваляе ім паспяхова вырашаць галоўную задачу – бачыць у кожным навучэнцу зярняты навуковых і творчых здольнасцей. Ларыса Барысаўна ўручыла выкладчыкам граматы і падзякі ад Брэсцкага абласнога камітэта Беларускага прафсаюза работнікаў адукацыі і навукі.

Затым студэнты БрДУ паднеслі любімым выкладчыкам сваю творчасць. Паветраны вальс Цімафея Стаіна і Алісы Дземяшчук, кранальныя кампазіцыі ў выкананні Кацярыны Граноўскай і Аляксандра Жарына, туркменскія мелодыі замежных навучэнцаў, інструментальны нумар Міхаіла Раманюка і іншыя выступленні падарылі гледачам шмат станоўчых эмоцый і добрых пажаданняў, лістапад. Таксама святочная праграма ўключала мультымедыйную прэзентацыю, што адлюстравала нялёгкія, але шматгранныя будні педагогаў, у якіх арганічна спалучаецца мудрасць і маладосць душы, творчасць і энергія, строгасць і справядлівасць.

Дарагія нашы выкладчыкі! Вы заўсёды побач са студэнтамі: на занятках далучаеце іх да таямніц навукі, а ў пазавучэбны час дапамагаеце з арганізацыяй розных мерапрыемстваў. Вы акрыляеце нас на шляху да пастаўленых мэтаў. Мы захапляюся вашым прафесійным майстэрствам, схіляемся перад вашым вопытам, дзякуем за ўдзел у нашых лёсах. Жадаем вам моцнага здароўя, даўгалецця, натхнення і аптымізму!

Юлія Воўк, рэдактар студэнцкага клуба