Адкрыты ўніверсітэцкі конкурс «Грамацей–2019»

25 верасня адбыўся адкрыты ўніверсітэцкі конкурс «Грамацей–2019», які ўжо ў юбілейны дзясяты раз арганізуе кафедра агульнага і рускага мовазнаўства філалагічнага факультэта. Удзельнікамі конкурсу сталі студэнты чатырох факультэтаў універсітэта – філалагічнага, геаграфічнага, псіхолага-педагагічнага і факультэта замежных моў, а таксама навучэнцы шасці гімназій, двух ліцэяў і дзвюх сярэдніх школ горада Брэста. У гэтым годзе пераканацца ў ступені пісьменнасці сваёй мовы вырашылі 78 студэнтаў і вучняў.

«Грамацей–2019» пачаўся з вітальнага слова ўдзельнікам загадчыка кафедры агульнага і рускага мовазнаўства В. Б. Пераход. Затым студэнт 4 курса філалагічнага факультэта Несцярук Андрэй выступіў з паведамленнем пра вядомага рускага лінгвіста А. А. Шахматава, з дня нараджэння якога у 2019 годзе спаўняецца 155 гадоў. З цікавасцю выслухалі ўдзельнікі конкурсу і паведамленне студэнткі 4 курса Засімук Вікторыі аб найноўшых арфаграфічных слоўніках, наяўных ва ўніверсітэце.

Конкурсная праграма складалася з двух этапаў – дыктоўкі і карэктурнага задання. Паколькі ў 2019 годзе наш горад адзначае свой тысячагадовы юбілей, і дыктоўка, і тэкст, прапанаваныя ўдзельнікам конкурсу для карэктуры, былі прысвечаны Брэсту.

У выніку сярод студэнтаў спецыяльных моўных факультэтаў 1-е месца ўжо трэці раз у гісторыі конкурсу заняў Шпарло Уладзіслаў (4 курс, спецыяльнасць “Журналістыка”), 2-е месца занялі Андрэева Кацярына (1 курс, факультэт замежных моў) і Майсейчык Ганна (1 курс, спецыяльнасць “Руская філалогія”), 3-е месца падзялілі студэнткі Ярмашэвіч Анастасія (2 курс, спецыяльнасць “Руская філалогія”), Вецік Яніна (3 курс, спецыяльнасць «Беларуская філалогія») і Місько Ганна (3 курс, спецыяльнасць «Беларуская філалогія»).

Студэнты неспецыяльных факультэтаў размеркавалі прызавыя месцы наступным чынам: 1-е месца ў Кудрэйкі Валерыі (2 курс, псіхолага-педагагічны факультэт), 2-е месца заняла Бронз Ганна (2 курс, псіхолага-педагагічны факультэт), 3-е месца ў Цярэшкі Валерыі (2 курс, геаграфічны факультэт).

Сярод школьнікаў лідарам стала Пішчык Марына (11 клас, ДУА «Гімназія № 5 г. Брэста»), 2-е месца заняла таксама вучаніца 11 класа ДУА «Гімназія № 5 г. Брэста» Раўнейка Маргарыта, 3-е месца падзялілі Пракапюк Ульяна (11 клас, ДУА «Гімназія № 4 г. Брэста», Навумавец Паліна (10 клас, ДУА «Гімназія № 1 г. Брэста») і Сыч Карына (11 клас, ДУА «Гімназія № 2 г. Брэста»).

З кожным годам у нашым конкурсе прымае ўдзел усё больш і больш студэнтаў і школьнікаў: так, калі удзельнікамі «Грамацея–2017» былі 56 чалавек, то і ў 2018, і ў 2019 гадах паспрабаваць свае сілы ў конкурсным спаборніцтве ўжо вырашыла больш за 70 удзельнікаў. Усё гэта сведчыць аб тым, што конкурс па-ранейшаму выклікае цікавасць і, вядома ж, абавязкова адбудзецца ў наступным годзе.

Кафедра агульнага і рускага мовазнаўства