Наш студэнт – залаты медаліст XXV чэмпіянату свету па гіравым спорце

З 13 па 16 кастрычніка ў грэчаскім горадзе Лутракі праходзіў XXV чэмпіянат свету па гіравым спорце. Гіравы спорт – цыклічны від спорту, у аснове якога ляжыць падыманне гір максімальна магчымую колькасць разоў за адведзены прамежак часу ў становішчы стоячы. Існуе дзве дысцыпліны ў мужчын і адна ў жанчын. Мужчыны спаборнічаюць у класічным двухбор’і (біятлон) або штуршку па доўгім цыкле. У сваю чаргу біятлон складаецца з двух практыкаванняў: штуршок дзвюх гір дзвюма рукамі ад грудзей і рывок адной гіры кожнай рукой. У рыўку дапускаецца адна змена рук без пастаноўкі снарада на памост. Пасля выканання двух практыкаванняў падлічваюцца ачкі ў суме двухбор’я. Штуршок па доўгім цыкле заключаецца ў закідзе гір на грудзі, выштурхоўванні ўверх ад грудзей, апусканні на грудзі і спуску ўніз без дотыку памоста. Практыкаванне выконваецца з дзвюма гірамі.

Студэнт 4 курса факультэта фізічнага выхавання Каранковіч Дзмітрый заняў I месца ў практыкаванні «біятлон» з гірамі 24 кг у вагавой катэгорыі 90 кг.

Жадаем Дзмітрыю далейшых поспехаў і яркіх спартыўных перамог!

Інфармацыю падрыхтавала Ірына Кузьміч (філалагічны факультэт)
па матэрыялах факультэта фізічнага выхавання і спартклуба