Зімовы сезон у ДПУ «НП «Белавежская пушча»

Студэнцкі атрад «Пушчанка» ў складзе 23 чалавек сёлета сабраў студэнтаў геаграфічнага (14 чалавек), юрыдычнага, гістарычнага, сацыяльна-педагагічнага, фізіка-матэматычнага факультэта і факультэта замежных моў.

Мы правялі незабыўны месяц у Нацыянальным парку «Белавежская пушча». Актыўна працавалі ў Музеі прыроды (камандзір – Ксенія Громік, камісар – Аляксандра Лявонава) і ў Маёнтку Беларускага Дзеда Мароза (камандзір – Раман Грышын, камісар – Ганна Мацука). З нашай дапамогай ў Музеі прыроды кожны наведвальнік мог пазнаёміцца з гісторыяй першабытнага лесу і яе насельнікамі, а ў Маёнтку – акунуцца ў казку, сустрэць Дзядулю Мароза, прайсці 15 «казачных» гектараў і загадаць цэлых 100 жаданняў!

Сваімі ўражаннямі падзялілася студэнтка II курса спецыяльнасці «Турызм і гасціннасць» Крысціна Мельнікава: «У гэтым годзе я ўпершыню пабывала ў Маёнтку Беларускага Дзядулі Мароза і атрымала магчымасць паўдзельнічаць у працэсе стварэння чараўніцтва. Дапамагаючы Дзядулю ў яго няпростых, але такіх важных справах, я праніклася атмасферай шчасця, радасці і чараўніцтва. Маёнтак Беларускага Дзеда Мароза пакінуў мне яркія ўражанні і ўспаміны, якія будуць грэць мяне да наступнага наведвання гэтага чароўнага месца! І будзьце ўпэўнены, у наступным годзе я абавязкова вярнуся за новымі незабыўнымі ўспамінамі, напоўненымі чараўніцтвам».

Таксама падзялілася сваімі яркімі ўражаннямі і студэнтка IV курса спецыяльнасці «Геаграфія» Аляксандра Лявонава, якая ўжо чацвёрты сезон нязменна прыязджае папрацаваць менавіта ў «Музеі прыроды»: «Праца ў музеі падарыла толькі станоўчыя эмоцыі і яркія ўражанні. Гэта была добрая магчымасць акунуцца ў свет раслін і жывёл Белавежскай Пушчы, даведацца пра новыя факты з гісторыі нацыянальнага парка, жыцця яе насельнікаў і, вядома ж, падзяліцца атрыманым багажом ведаў з людзьмі розных краін».

У кожнага з нас была праца па душы. Гэты месяц не проста даў нам новыя веды і ўменні, але і дапамог набыць новых сяброў. Зносіны з новымі людзьмі (нават замежную мову паспелі падцягнуць), свежае паветра і адпачынак ад гарадской мітусні... а што можа быць лепшым для студэнта геаграфічнага факультэта?

Кожны працоўны дзень пакідаў ў памяці новыя фарбы, прыносіў радасць і ўсмешку. Шмат хто з нас працаваў у складзе сэрвіснага студэнцкага атрада ў Белавежскай пушчы не ўпершыню, таму сумяшчаць вучобу з працай было не так ужо і цяжка. Бо, калі займаешся любімай справай, з усімі цяжкасцямі спраўляцца намнога лягчэй. У сцены ўніверсітэта мы вярнуліся з незабыўнымі ўражаннямі, поўныя энергіі і сіл на будучую сесію.

Студэнцкі атрад «Пушчанка» выказвае вялікую ўдзячнасць за атрыманую магчымасць папрацаваць у Нацыянальным парку «Белавежская пушча» дырэкцыі прыродаахоўнай установы, дэкану геаграфічнага факультэта Ірыне Васільеўне Абрамавай і першаснай арганізацыі БРСМ. Таксама дзякуем за дапамогу і падтрымку сваім непасрэдным кіраўнікам – Людміле Уладзіміраўне Парфянюк і Людміле Фёдараўне Грачанік.

Студэнты спецыяльнасці «Геаграфія»
Ганна Мацука і Аляксандра Булахава