Выязныя мерапрыемствы геаграфічнага факультэта ў Пінскім каледжы

9 лютага 2018 г. на базе Пінскага каледжа прайшлі прафарыентацыйныя і вучэбна-метадычныя мерапрыемствы, арганізаваныя геаграфічным факультэтам і цыклавой камісіяй прыродазнаўча-матэматычных дысцыплін каледжа.

Перад вучнямі выпускных курсаў каледжа з прэзентацыяй спецыяльнасці «Турызм і гасціннасць» (скарочаная форма навучання) выступіў загадчык кафедры турызму і краіназнаўства Аляксандр Данілавіч Панько. Выпускнікі каледжа, якія скончылі аднайменную спецыяльнасць, маюць магчымасць паступаць ва ўніверсітэт на дзённую і завочную скарочаныя формы атрымання адукацыі. Варта адзначыць, што ў Беларусі падрыхтоўка выпускнікоў каледжаў на дзённай форме атрымання адукацыі па спецыяльнасці «Турызм і гасціннасць» (скарочаная форма навучання) ажыццяўляецца толькі на геаграфічным факультэце Брэсцкага дзяржаўнага ўніверсітэта імя А.С. Пушкіна.

Прафесар Канстанцін Канстанцінавіч Красоўскі прапанаваў увазе навучэнцаў невялікі майстар-клас, прадэманстраваўшы фрагмент класічнай універсітэцкай лекцыі па геадэмаграфіі.

Наступнае мерапрыемства было арганізавана для старшакласнікаў трох сярэдніх школ г. Пінска, сярод якіх былі і вучні 11-х класаў педагагічнага профілю (тыя, якія наведваюць факультатыў «Уводзіны ў педагагічную прафесію»). Загадчык кафедры геаграфіі і прыродакарыстання Максім Альбертавіч Багдасараў прэзентаваў відэаролік аб нашым універсітэце, расказаў пра ўсе факультэты і спецыяльнасці, на якія могуць паступаць школьнікі. Асаблівая ўвага была звернута на асаблівасці навучання на геаграфічным факультэце, дэвіз якога – «У нас вучыцца заўсёды цікава!» Цікавасць у навучэнцаў выклікала абмеркаванне ўмоў паступлення на спецыяльнасць «Геаграфія» выпускнікоў педагагічных класаў сярэдніх школ.

Аляксандр Данілавіч Панько расказаў навучэнцам пра перавагі навучання на спецыяльнасці «Турызм і гасціннасць». Сустрэча завяршылася прэзентацыяй відэароліка аб геаграфічным факультэце.

У другой палове дня адбыўся вучэбна-метадычны семінар «Геаграфічная і экалагічная адукацыя як фактары ўстойлівага развіцця грамадства: сучасны стан, праблемы і перспектывы». Семінар быў сумесна арганізаваны дзвюма кафедрамі геаграфічнага факультэта і цыклавой камісіяй прыродазнаўча-матэматычных дысцыплін каледжа. У рамках семінара з дакладамі на актуальныя тэмы вывучэння пытанняў геалогіі і палітычнай геаграфіі ў курсе геаграфіі ў сярэдняй школе выступілі Максім Альбертавіч Багдасараў і дацэнт кафедры турызму і краіназнаўства Сяргей Аляксандравіч Заруцкі.

Загадчык кафедры турызму і краіназнаўства
Аляксандр Данілавіч Панько