Семінар «Распазнанне фактараў суіцыдальнай рызыкі»

У рамках «Комплексу мер па прадухіленні суіцыдальных паводзін насельніцтва Рэспублікі Беларусь на 2015-2019 гг.» 20 снежня 2017 года ў БрДУ імя А.С. Пушкіна прайшоў семінар «Распазнанне фактараў суіцыдальнай рызыкі» для намеснікаў дэканаў па выхаваўчай працы, куратараў вучэбных груп, спецыялістаў аддзела выхаваўчай працы, педагагічных работнікаў і студэнцкага актыву інтэрнатаў студэнцкага гарадка. Мэтай мерапрыемства было псіхалагічнае інфармаванне педагогаў і студэнтаў па пытаннях распазнання, папярэджання і прафілактыкі суіцыдальных паводзін сярод навучэнцаў.

У якасці эксперта на семінар быў запрошаны галоўны пазаштатны урач-псіхатэрапеўт УАЗ Брэсцкай вобласці Аляксандр Сяргеевіч Прыступа. Ён пазнаёміў усіх прысутных са статыстыкай па праблеме суіцыдаў у Брэсце і Брэсцкай вобласці, расказаў пра фактары рызыкі і катэгорыі людзей, найбольш схільных да гэтага віду адыкцыі. Аляксандр Сяргеевіч акцэнтаваў увагу на тым, што суіцыдальныя паводзіны ў пераважнай большасці выпадкаў здзяйсняецца псіхічна здаровымі людзьмі, і толькі 10-14 % схільных да суіцыдальных паводзін людзей пакутуюць псіхічнымі расстройствамі.

У канцы свайго выступлення А.С. Прыступа адзначыў важнасць сумеснай працы ўсіх спецыялістаў па прафілактыцы суіцыдальных паводзін сярод моладзі.

Далей удзельнікі семінара актыўна задавалі пытанні прысутным спецыялістам і абмяркоўвалі актуальныя праблемы, якія існуюць у студэнцкім асяроддзі.

Завяршыўся семінар выступленнем Ганны Паўлаўны Шывілька, педагога- псіхолага сацыяльна-педагагічнай і псіхалагічнай службы ўніверсітэта. Яна расказала пра праблему суіцыдальнай рызыкі сярод студэнтаў I курса ўніверсітэта і дала параўнальную характарыстыку па факультэтах за 2 апошнія навучальныя гады.

Сацыяльна-педагагічная і псіхалагічная служба