Ратуючы жыццё

25 верасня 2018 года ў нашым універсітэце праходзіў Дзень донара. Традыцыйна прыняць удзел у добраахвотніцкай акцыі выказалі жаданне многія студэнты і выкладчыкі, таму што ведалі: яны, якія вядуць здаровы лад жыцця, здольныя выратаваць не адно жыццё. У гэты дзень было здзейснена 57 здач крыві. Як адзначылі медыцынскія работнікі, гэта самы вялікі аб’ём крыві за апошнія чатыры гады, узяты ва ўніверсітэце.

Паколькі навучэнцы і работнікі БрДУ ужо не першы раз становяцца донарамі, яны заўсёды рыхтуюцца да гэтага, а менавіта прытрымліваюцца дыеты: за некалькі дзён да працэдуры забору крыві не ўжываюць у ежу смажанае, вострае, салёнае, малочныя прадукты, яйкі і фінікі, раніцай снедаюць і п’юць дастатковую колькасць вадкасці.

Медыцынскія работнікі звяртаюць увагу на тое, што для здаровага чалавека донарства карыснае. У людзей, якія рэгулярна здаюць кроў, значна зніжаецца рызыка анкалагічных, сардэчна-сасудзістых і іншых захворванняў. Здача крыві садзейнічае прадаўжэнню маладосці і спрыяе нармальнаму функцыянаванню арганізма, а абследаванне крыві на розныя інфекцыі перад працэдурай дазваляе кантраляваць стан здароўя.

Наступны забор крыві ў БрДУ запланаваны на кастрычнік.

Юлія Воўк, рэдактар студэнцкага клуба