Крок левай, крок правай: у БрДУ адбыліся мерапрыемствы, прымеркаваныя да Дня фізічнай актыўнасці

6 красавіка адзначаецца Сусветны дзень фізічнай актыўнасці. Паколькі і супрацоўнікі нашага ўніверсітэта выступаюць за здаровы лад жыцця, прафсаюзны камітэт работнікаў сумесна з кафедрай фізічнай культуры арганізавалі мерапрыемствы, накіраваныя на актывізацыю рухальнай актыўнасці.

Жадаючыя размяцца сабраліся ў вялікі круг у фае другога паверха корпуса № 1 БрДУ і пад рытмічную музыку выканалі розныя рухі. Каб фізічная нагрузка прынесла не толькі карысць, але і зарадзіла добрым настроем на ўвесь дзень, канцэпцыя комплексу практыкаванняў была прадстаўлена ў выглядзе падарожжа ў Тайланд. Работнікі БрДУ дабіраліся туды пешшу, уплаў, скалалазаннем і нават на вярблюдах. Завяршыліся мерапрыемствы запальнай ламбадай.

Вось такая карысная і цікавая размінка ў нас атрымалася. Спадзяёмся, што супрацоўнікі ўніверсітэта будуць і ў далейшым актыўна ўключацца ў падобныя мерапрыемствы.

Юлія Воўк, рэдактар студэнцкага клуба