III Рэспублiканская навукова-практычная канферэнцыя «Камунікатыўная прастора і інфармацыйнае поле ў мове і маўленчай дзейнасці»

12 красавіка 2018 года на псіхолага-педагагічным факультэце прайшла III Рэспубліканская навукова-практычная канферэнцыя «Камунікатыўная прастора і інфармацыйнае поле ў мове і маўленчай дзейнасці», арганізаваная кафедрай агульнаадукацыйных дысцыплін і методык іх выкладання.

Мэта мерапрыемства заключалася ў аналізе вынікаў навуковых даследаванняў вучоных, спецыялістаў-практыкаў, маладых даследчыкаў па праблемным полі канферэнцыі, у абмене навуковымі вынікамі, даследчым вопытам.

З вітальным словам да ўдзельнікаў і гасцей канферэнцыі звярнуліся дэкан псіхолага-педагагічнага факультэта, кандыдат філалагічных навук, дацэнт Святлана Серафімаўна Кацэвіч і загадчык кафедры агульнаадукацыйных дысцыплін і методык іх выкладання, кандыдат філалагічных навук, дацэнт Галіна Міхайлаўна Канцавая.

Канферэнцыя, злучыўшы шырокі спектр навуковых інтарэсаў, аб’яднала вучоных, выкладчыкаў ВНУ, аспірантаў, настаўнікаў і студэнтаў. Спектр праблем, якія абмяркоўваліся як на пленарным, так і на шасці секцыйных пасяджэннях, быў рознабаковым і шырокім. Дакладчыкамі былі закрануты праблемы тэксту і дыскурсу, мастацтва слова і культуры маўлення, канцэптуалізацыі і катэгарызацыі рэчаіснасці/рэальнасці ў мове і маўленні, паэтычнага аспекту слова і рытарычнага плана маўлення, канструявання інстытуцыянальнай рэальнасці ў маўленні, граматнасці і кампетэнтнасці носьбітаў мовы і ўдзельнікаў камунікацы, структуры камунікатыўнай прасторы суб’екта маўлення, этасу слова і пафасу маўлення, канцэпту поля ў гуманітарных і прыродазнаўчых навуках і інш.

Абмеркаванне дакладаў было прадуктыўным і інфармацыйным. Канферэнцыя паспрыяла інтэнсіўнаму абмену думкамі і ўмацаванню сувязяў паміж навукай і практыкай.

Змястоўныя даклады, навуковыя дыскусіі пакінулі самыя добрыя ўражанні ва ўсіх удзельнікаў. Па выніках працы навукова-практычнай канферэнцыі будзе выдадзены зборнік матэрыялаў.

Арганізацыйны камітэт выказвае шчырую ўдзячнасць усім удзельнікам канферэнцыі (толькі сумеснымі намаганнямі ў ходзе канструктыўнага і зацікаўленага дыялогу магчыма знайсці аптымальныя шляхі рашэння актуальных праблем) і запрашае даследчыкаў да супрацоўніцтва і ўдзелу ў канферэнцыі ў наступным годзе.

Кафедра агульнаадукацыйных дысцыплін і методык іх выкладання