Атрады маладосці нашай: у БрДУ адбылося закрыццё трэцяга працоўнага семестра

Адно са значных мерапрыемстваў восені для нашага ўніверсітэта – закрыццё трэцяга працоўнага семестра. У гэтым годзе падвядзенне яго вынікаў адбылося 9 кастрычніка. Мінулым летам у студатрадах на карысць горада і краіны працавалі больш за 800 навучэнцаў БрДУ.

З прывітальным словам да іх, а таксама да студэнтаў, якія былі валанцёрамі на II Еўрапейскіх гульнях, і да астатніх удзельнікаў мерапрыемства звярнулася рэктар універсітэта Ганна Сендзер. Яна адзначыла значнасць традыцыі правядзення злёту студэнцкіх атрадаў, бо энергічная моладзь вартая ўзнагарод. Яе падтрымаў першы сакратар абласнога камітэта ГА «БРСМ» Юрый Сегянюк, які падкрэсліў, што байцы студатрадаў універсітэта ўносяць важкі ўклад у добраўпарадкаванне горада і краіны.

Ганна Мікалаеўна ўручыла падзякі рэктара за арганізацыю на высокім прафесійным узроўні ўдзелу студэнтаў і супрацоўнікаў універсітэта ў якасці валанцёраў у ІІ Еўрапейскіх гульнях. Цырымонія ўзнагароджання працягнулася называннем лепшых камандзіраў студэнцкіх атрадаў. А Юрый Сяргеевіч узнагародзіў падзякамі Брэсцкага абласнога камітэта ГА «БРСМ» рэктара і прарэктара па выхаваўчай працы ўніверсітэта.

Летам на розных аб’ектах старанна працавалі 49 студэнцкіх атрадаў БрДУ, у ліку якіх педагагічныя, будаўнічыя, сэрвісныя і валанцёрскія. Сілы многіх навучэнцаў былі кінуты на будаўніцтва Заходняга абхода, адкрыццё якога прымеркавалі да 1000-годдзя горада. Працаваць на такім аб’екце – ганарова. І ў тым, што нашым студэнтам пашчасціла прыкласці намаганні да стварэння важнай транспартнай развязкі, заслуга наймальнікаў. Ва ўрачыстай абстаноўцы некаторым з наймальнікаў часова выконваючы абавязкі першага сакратара Брэсцкага гарадскога камітэта ГА «БРСМ» Аляксандр Зорын ўручыў падзякі.

Прарэктар па выхаваўчай працы Таццяна Сакалова, адзначыўшы, што БрДУ ганарыцца поспехамі студэнтаў-студатрадаўцаў, уручыла падзякі штаба працоўных спраў дэканам факультэтаў і іх намеснікам за іх пасільную дапамогу ў правядзенні «Працоўнага лета». Такія ж узнагароды з рук кіраўніка па выхаваўчай працы Таццяны Кошык атрымалі камандзіры і байцы студатрадаў. Граматы штаба працоўных спраў уручыў прафесар кафедры турызму і краіназнаўства Канстанцін Красоўскі. Лепшыя студэнцкія атрады прынялі дыпломы штаба працоўных спраў ад яго кіраўніка Вікторыі Тарасюк.

Штогод навучэнцы БрДУ даказваюць, што студэнцкія атрады ўяўляюць сабой магутны рух, якое фарміруе характар, развівае лідарскія здольнасці, дазваляе раскрыць прафесійныя ўменні і набыць сяброў.

Студэнцкі клуб